Regiment Awt Adjudante Flaarisse

Jaorelank haet de Sjtadsvastelaovesvereniging De Flaarisse op de letste vastelaovesdaag 's middigs de "Laot Gaon, Loat Gaon" middig oppe mèrt en 's aovends 't "Sjmartlappefestival" in de Hanehof georganiseerd. Nao enkele succesvolle jaore, veel de publieke belangsjtelling biej dees activiteite de letste tied echter get taenge. 't Waor dan auch tied veur ein angere formule.

Aafgelaupe tweej jaor höbbe de Flaarisse zich, mit medewerking van 't Senaat, de SAP, 't RAAF en 't SJPAS en in samewirking mèt de Gelaense horeca biejein gepak mit als doel, de aovend van de aafsjleeting van de Gelaense Vastelaovend angesj in te gaon vulle. In de plaatsj van de tweej geneumde activiteite is d'r ein nuuj boete-evenement in de aovendoere ontsjtange, de "Waereldsjtad Taptoe".
't Moosjte onger 't motto "Nog eine paaf alaaf" weer ein paar echte auwerwets gezellige en echt gooije leste urkes vastelaovend waere. En dat is de organisatie dan auch zeker gelök!!! 't Succes van 't eësjte tweej jaor sjmaakde de organisatie dan auch nao meer en zo zal dan auch dit jaor veur de derde keer de "Waereldsjtad Taptoe" georganiseerd waere op dinsdig 21 fibberwari.