Regiment Awt Adjudante Flaarisse

Editie 2012:

Eder jaor nao de Revue Gelaen Waggelt en de oetrooping van de nuuje Waerldsjtad prins zètte de wies men van 't RAAF zich zo gauw meugelijk biejein om ein program same te sjtèlle rondjom 't jaorlijkse Vlaghijsen. Auch kommend jaor zal 't RAAF dit weer verzörge en waal op zondig 12 fibberwarie zo wiej gebruukelijk biej de residensie van de nuuje Sjtadsprins van de Waereldsjtad 2012. Dit jaor lèg de residentie in Gelaen Zuid, de Minckelerssjtraot 5 om precies te zeen. Traditioneel wurd nao ein korte optoch 't program ongeveer vanaaf 11 oer 11 gesjtart. 't RAAF probeert in ein humoristische setting en mit ein gevarieerd program dit officiële moment aan te kleije. 't Ganse program wurd uiteraard speciaal toegesjpitst oppe prins, zien adjudante en de auwesj van de prins. 

Historie vlaghijsen:

Elk jaor organiseerd 't RAAF 't inmiddels traditionele vlaghijsen. Biej de residensie van de nuuje sjtadsprins wurd de zondig veur de vastelaovend, nao ein kort en veural ludiek programma, de vastelaovesdriekleur officieel gehesen. Veur de Prins, zien auwesj en zien Adjudante ein van de hoogtepunte in 't sezoen, es biej hun thoes de officiele vlag de loch in geit onger de klanke van 't Limburgs volksleed. 't RAAF haet dees activiteit nao zien oprichting euver genomme van de binnen Gelaen bekènde groep "De Buulebloazers" en ein geheel eigen -RAAFse- invulling aan 't program gegaeve. 

De Buuleblaozers, die dit evenement zo wiej gezag veurhaer verzörgden, zeen in 1980 begoosj es vastelaovesclub. De naam van de groep is aafgeleid van hun eësjte activiteit. Ziej seerden namelik jaorlijks de optochroute mit zo'n 20.000 ballône (buule), die ziej zelf deege blaoze, knuipe, aaneinbènge en aan alle lantaarnpöl langs de route deege ophange.
De Buule zeen auch begoosj mit 't vlaghijsen biej de Prins. De aanleiding hiejvan, waor dat in 1981 ein van hun leeje, Jos Cremers, Sjtadsprins van de Waereldsjtad waor. Nao ein gesjlaag evenement höbbe de Buule dit hiejnao op verzeuk van de Flaarisse tot en met 1996 eeder jaor mit völ plezeer opnuuj georganiseerd. Toch waor men toen van meining dat 't tied waor 't sjtekske euver te drage en men waor zeer verheugd, dat ein angere groep dit prachtige evenement wilde voortzètte. Vanaaf 1997 verzörgt 't RAAF dit evenement dan auch vas.

De Buule zeen es club nog ummer actief mit de vastelaovend bènne 't Gelaense. Mèr auch boete de vastelaovend zètte ziej zich nog ummer in veur os sjoon Waereldsjtad. Zo is op hun initiatief onger angere ein nuuje Gelaense vaan geïntroduceerd. Auch zeen ziej de initiatiefnömmers van de jaorlikse Marcellinus en Petrus Feesten elk eësjte weekend in juni oppe mèrt in Gelaen.