Regiment Awt Adjudante Flaarisse

’t Waor op ’t letst van de zomer van 1996, dat enkele ex-adjudante veur ’t eesj biej mekaar kaome. Destieds nog biej ’t awtste Cafe van Gelaen, Café Bertha, op de Riekswaeg Noord (oppe foto: 't auwe pandj van café "Biej Bertha", waoin taengewoordig 't bedrief IDHW is gevestigd). Veer es Awt Adjudante waore dao oetgeneudigd op initiatief van de Flaarisse en enkele leden van de Soosjeteit Awt Prinse van de Flaarisse (SAP).

’t Doel van die biejeinkomst waor om te bekieke of d'r ein club geformeerd koosj waere van Awt Adjudante. Ut veurnaamste doel van dees klub zou zeen ’t opvange van de Adjudante die elk jaor aaftreeje in de Hanenhof. Bovendien waore de Flaarisse op zeuk nao ein club welke 't traditionele vlaghijse biej de Sjtadsprins wilde organiseere. De Buuleblaozers, die dit jaore gedaon heije, wilde gear ’t sjtekske euver gaeve aan angere.

Nao ein of twee vergaderinge, waor d’r neet geliek ein groot draagvlak veur dees vereiniging. Mèr nao ein derde vergadering, woord d’r toch besjlaote om de hènj inein te sjlaon en van sjtart te goan. ’t RAAF waor gebaore.

Ut eesjte joarsjtong veural in 't teike van veul algemeine zake regele. D’r moosj vanalles gebeure om ’t RAAF vorm te gaeve. Gelökkig waor d’r veul hulp bénne ut Gelaense. Zo teikende o.a. Ruud van Wersch os logo, wat veer noe nog sjteeds euveral gebroeke. Naodat veer alles zo’n bietje gereegeld heije, ginge veer es greune vereiniging de vastelaovend in. Veer belaefde ein fantastisch sezoen, mèt es hoogtepunt ’t eësjte vlaghijse biej Prins Hans 4e Lemmens. 't Sezeon waor gesjlaag en de basis veur 't RAAF woar gelag!

Inmiddels lèg 't eësjte jubileum alweer ein tiedje achter os en is 't RAAF ein enthousiaste club Awt Adjudante, mèt meer es 20 actieve leeje. De aafgelaupe joare höbbe veer veul nuuje leeje maoge begroete. Veer kènne boewe op de inzèt van allemaol, en de sjteun van alle Gelaense vastelaovesgèkke. Veer haupe dat veer nog joare en joare aktief kènne blieve in 't Gelaense!