Regiment Awt Adjudante Flaarisse

De jónges van 't R.A.A.F.

Tekst: Paul Donners, Joost Eussen, Michel Penris 
Meziek: Bettina Kamps 
Zangk: Sandra Hoen en ut Regiment

Couplet 1:
Wur-ste adjudant dan lèt-ste op de prins,
jao dat deis-te driej daag lang.
Same höb-ste sjpas, deis alles wat-ste kèns,
de blifs mèr aan de gang.
En is dae tied veurbiej, jao dat is toch bekènd,
dan kump-ste biej ’t rezjiment

refrein:
Nemes hilt ze taenge es ’t tied is veur alaaf,
dao zeen de jónges van ’t RAAF.
Ós Waereldsjtad dat haet, zien eige rezjiment,
dat euveral wurt gezeen en euveral wurt gekènd.
Veur ózze vastelaovend, gaon zie d’r taenge’n-aan,
en es ze weer marsjere, jao dan gaef ze mèr vriej baan.
Nemes hilt ze taenge es ’t tied is veur alaaf,
dao zeen de jónges van ’t RAAF.

Couplet 2:
Kiek ze noe ‘ns gaon, alaaf en veuroet marsj.
Vastelaovend toegewied.
Gaon ze ummer wier, ’t geit jao dat ’t barsj
en sjpas kènt geine tied.
Want ummer zeen ze dao, in gans Gelaen prezent,
Zoa is ’t biej ’t rezjiment.

Couplet 3:
Zonjigs van te veure hijse zie de vlag,
biej ’t hoes van ózze Prins.
Mit Flaarisse op sjtap, dat wurt ein lange nach,
De laefs jao toch mèr èns.
Es gooje kammeraoje, zoa zeen zie gekènd,
Zoa is ’t biej  ’t rezjiment.

Lètste refrein:
Nemes hilt ós taenge es 't tied is veur alaaf,
veer zeen de jónges van ’t RAAF.
Ós Waereldsjtad dat haet zien eige rezjiment,
dat euveral wurt gezeen en euveral wurt gekènd.
Veur ózze vastelaovend, gaon veer d’r taenge’n-aan,
en es veer weer marsjere, jao dan gaef ós mèr vriej baan.
Nemes hilt ós taenge es ’t tied is veur alaaf,
veer zeen de jónges van ’t RAAF.